一粒四射e新星

                --記蔣為文

         /林央敏

    1990年以前e政治民主運動e內涵一直攏參著台灣人e民族復興e喝聲,jit落聲音佮行動叨表現置台語e使用頂面,當時「台灣人講台灣話」e意識形成一股真誠大e力量,jit股力量催化著台灣人反抗殖民壓迫e意志,覺悟被外來奴化e憤慨,因此幫助党外(含民進党)佮民主運動成長。

    但是置1986年以前,台灣人意識e恢復干那表現置「話語」e堅持,八六年以後,這個「民族意識」才明顯深化入去文字寫作e階層,開始形成「台語文字化」e唱聲,ah台語文字化上蓋落實兮叨是表現置台語文學運動頂頭,這個台灣人e文藝復興運動起初干那由幾位有民族覺悟e中文作家佮少數語言學者佇(deh)(qiaˇ)旗羿(iat)風,到gah 1991年e款,我置幾擺台文場會,逗逗熟似一寡大學生,若來若發覺怹(in)是一群對台語文和台語文學攏真熱心e少年囝仔,吥只安呢,怹對民主政治、對台灣獨立建國、對打倒外來統治e認識佮堅定不止置大學生裡是一流兮,甚至都勝過當初時文化界、學術界e真儕「出名」e華語派文人,jit沿真有民族意識e大學生,置台文界裡若準有一個通稱叫做「少年輩兮」,阿文仔(蔣為文)叨是jit群少年家之一。

    一般的,人置少年時攏卡正直硬氣,有理想有熱情,一旦離開學堂,入去社會,大多數e人真緊叨消風「變款」去,會凍堅持理想e人本來叨少,尤其一個文學少年,吥管置青襟時代偌呢興沸沸(putput),到gah噯食「頭路」來「窒(deh)腹」e生命關頭,有功力腹肚縖(haˇ)咧繼續寫作e青年叨親像「寒星孤影」,是啦,當初彼群台文界e少年輩兮,jit陣攏卒()業矣(a^),去食頭路、娶某嫁尪、生男抱女...,抑擱願意為台語文奉獻青春e人挺好屈指推算,我真歡喜,阿文仔也是jit群「寒星」之一,尤其歡喜伊veh出台文冊矣!

    戰後台語文學運動以來e典型性台灣作家(台文作家)雖然抑擱真少,但是最近十年來e台文界,若照參予運動e時辰佮對運動e貢獻度來分,真明顯會凍斷出兩個世代,阿文仔jit沿「少年輩兮」ah佮一部份九○年代才開始跨來台語文學e老、中、青輩e華語作家算是第二代,其中阿文仔不但是第二代e旗手之一,置現步整箇台文界裡,伊e文學才華四射,ma相當傑出,詩、散文、小說攏會堪哩接受文學美學e評鑑,尤其詩作,更加會容(ingˇ)哩顯示出伊e文才。

    目前置台語文受盡迫害擱欠教育e文化生態裡,茲e對台灣特別有真情疼心擱肯用台文寫作e人算起已經昧喏少,但是ui文學e觀點來看,卡有文學才賦e彩筆抑無蓋儕枝,看阿文仔e作品,我敢肯定伊除了有爸母生成e文才之外,擱有經過多種美學e訓練,jit項訓練無一定來自先生(老師)e教示,我認為阿文仔家己叨有自我鍛煉e才能。置伊e作品裡,我發覺伊真講究捶(duiˇ)字用詞,真敖(qauˇ)經營斷裂孤立e意象,而且擱卡無簡單兮是文句造gah誠自然,讀起真順口。另外有一部份e詩,文句欲似卡jiann()卡素,其實怹e詩質是「藏」置篇段中間,噯詳細哺才哺會出味。

    阿文仔e文學作品擱有一點是台灣華語文壇e青年輩所due()昧著兮,叨是作品內容e社會性佮本土性,這當該然是作者本身e思想特質所產生兮。jit點我置本文頭前叨已經有講著矣,阿文仔jit沿e台語學生箇箇(grˇ)都是台灣進步派e大學生,覺悟早,擱有參予著社會改革運動和台灣文化再生運動,至少也互茲e運動淘(tua_)洗過,所以作品言之有物,文裡有情有義有思想。我相信阿文仔若甭(mai^)放棄伊e才華,jit條路繼續擱行落去,伊e詩作真緊會變成本土(台語)象徵派詩風e一種典型。

    映望『海翁』jit本冊趕緊出世,會凍看著伊卡儕卡完整e作品,但是干那憑阿文仔寄來ejit本詩文集e部份初稿打樣,我敢下(he_)jit款斷言:阿文仔絕對是多才多風格e詩人。我想,日後老仙凋零e歲月裡,台語文學e重旗需要像阿文仔jit款人才踦起來繼續扛落去。

                 ---------- 林央敏 1996/05/03 桃園龜山

 

(本文台文用字尊重作者用法)