/詩評/

    原罪、救贖、海翁e痛苦

                      －－解讀為文e詩

      /陳明仁

    為文beh 出冊--a，愛我ka寫詩評。I ka詩稿送--來，我koh斟酌讀一遍，想起真che tai-chi。

    若講台灣e學生台語文運動beh ka分期，允言算是開路e人；學生台灣語文促進會創會e成員long算第一期--e，各校long有代表性e人物，為文是淡江e代表人。Chia-e學生kap我long有不止a深e交陪，in e台語文底ti long真在，無輸社會e台文工作者。為文台語文e程度，tt我感覺內ka-na m是上好--e，che是三、四年前e印象。

    94年我ti台文通訊社開辦台文寫作會了後，為文結束淡江e學業，khah捷參加，差不多tak pai long有theh出作品，大部分是詩；ti參加寫作會討論e時，罕得發表意見，kan-taj tiam-tiam聽人講，若對i e作品有啥批評，m-bat有異議，i注神聽別人發言，吸收營養分，ho. i e作品愈來愈成熟。我想台文寫作會可能對i有相當e影響。

    為文e詩引起我注意--e，頭一首是「粉鳥ham斑甲」。這首有傳說koh有暗示kap思想哲學e詩，ho.我想著「貓a e天堂」這篇小說。Ti這首詩內底，會tang思考生存e價值觀，lan會sai揀gau飛koh代表自由、和平e粉鳥，抑是為三頓走chong、有siu thang居就滿足e斑甲。為文e詩差不多long帶有政治意涵，讀這首詩，ho.我想著台灣前途e問題，是beh接受安排「維持現狀」抑是走chhoe飛khah koan e風險－－自由kap和平。

    哲學kap政治意涵是為文詩作真重要e精神，lan來看i選做冊名e這首詩「海翁」。若khah早i寫這首詩，lan be做啥物政治聯想，m-koh，che是i寫ti 96年二月初十--e，當然會想著彭明敏，「海翁」是彭--先生選舉e標頭。這首詩chiah七choa nia，i 講：

 「我聽著海翁teh叫

   I，浮出我e腦海

   親像teh抗議

   為啥物

   海

   對i來講

   是痛苦e深淵！」

    Lan先來解讀頭一層意涵，海翁teh叫，我是m-bat聽--過，m-koh對作品e內容來想，一定是痛苦e叫聲，這款影像ho.作者難忘，i感覺海翁是teh抗議i家己所生存e海，na會煞變做i上kai深沉e痛苦。Ti哲學e意涵來看，來自大海e海翁－－海e勇士，i勢力範圍e大海，應該是i消遙自在e天地，是按怎會造成i hiah深沉e痛苦？是i無hoat-to.體會koh khah深e層次，抑是i恨be tang到陸地？

    自政治面來解讀，海是海翁e故鄉，boe輸台灣是彭明敏e故鄉，若m是i對故鄉e愛，kam著愛忍受迫害，kam著愛ti i會tang消遙天年e時koh為台灣轉來走chong？彭教授若beh抗議，m知beh向台灣人、國民黨抑是上帝ho. i e愛心抗議。讀這首詩e時，我另外有一個聯想，海翁通常ho. lan e印象是噴水，m-koh這chun e海翁是用叫--e－－痛苦e叫聲，tng-tong我ti電視看著彭教授用put-tap-put-chhit e CHI-NA語teh演講e時，我心thang-thiaj；i為beh爭取「異類」e選票，艱苦ma愛發出痛苦e「叫聲」。

    彭明敏為著故鄉e愛，食老koh著愛轉來台灣chhia-piaj，i有真大e無奈kap痛苦；對海翁來講，海是i痛苦e深淵；海翁e痛苦來自大海－－i一世「魚」hiau-pai、chhiaj-iaj e所在，海翁若會hiau反省，應該檢討i e痛苦是來自對大海e原罪kap救贖。Kam講台灣人原罪、救贖e十字架著愛落ti彭教授一人e肩kah頭？

    若beh講為文利用文學作品做政治意涵e抗訴，ti i大部分e作品long會tang讀--著，「野薑a花開」一讀就知是teh講施明德、「島嶼」所代表e時代意義、「亞熱帶」、「Ak-chak e樹林」……long有深沉e政治思考，若beh隨篇討論，會tang寫一本冊，我kan-taj beh koh講一篇個人認為khah特別e作品「Be gian koh搬布袋戲e姊夫」。

    聽這首詩e名，就知kap向陽e名作「搬布袋戲e姊夫」有所牽聯。為文寫詩真che是寫ho.內行e道友讀--e，若對台語文學khah生疏e人，有一koa作品可能讀無lo.來，親像「一個故事」這首詩，若有聽過我寫詞、王明哲譜曲收ti「台灣魂」e一te歌「老a伯」--e，讀--起-來就加真有趣味。這首Be gian koh搬布袋戲e姊夫，ma是愛讀過向陽hit首詩e人，chiah有hoat-to.了解為文beh表達e思想內涵。

    向陽這首詩是真早晉前寫--e，詩內面講著布袋戲，有一koa比較khah傳統e物件，親像用東南派kap西北派講正義kap邪惡。為文這篇對向陽hit篇做一個khah深層e文化思考，i講in姊夫be gian koh搬布袋戲，放bo.放kiaj，講beh去流浪，走chhoe i理想e國度。結局有一工，in姊夫koh再搬布袋戲，這時i所搬e戲文是「西螺派」phah倒「中原派」。

    為文用這首詩beh替台灣建立一個文化獨立e新國度，用本土e「西螺」來phah倒「中原」，布袋戲若ti台灣iau有存在e價值，可能著愛好好a思考按怎建立台灣自主性，其他e藝術、文學ma kang款。

    這本「海翁」內面e詩，語言e運用long真口語化，若講我個人有啥beh ka嫌--e，就是i有「少年人講台語」e通病－－用真che不該有e「著」，親像「kan-taj弄『tioh』hit仙……」（Be gian koh搬布袋戲e姊夫）「阿媽牽『tioh』阮e手」、「種『tioh』甘蔗e三分地」（過溪e三分地）。

    Tng-tong台灣上大e反對黨e代主席kap自稱新世代認為發展台語文會阻礙黨e選票e時chun，為文beh出版i e台語文集，年歲來講，為文算是新世代，ho.我真大e感慨。台語文前受國民黨e打壓，後受反對黨e輕視，處境親像hit隻「十字架頂頭e老鼠」，ti hia ngiauh-ngiauh-chun，為文講i料想會到台語文e悲劇，這種悲劇m是死亡，是死亡前e侮辱。

    這本「海翁」e出版，應該是台語文悲劇性e尊嚴。

 

（本文台文用字尊重作者用法；原文有標調，但因電腦作業問題，省略）